المقلوبه 💕💕

اسلقي اللحمة الضاني او اي نوع حسب ماتحبي بس هي احلى بالضاني بالملح والفلفل الاسود وشوية قرفة (ضروري ماتكتريش القرفة ) يا دوبك راس المعلقة الصغيرة . 
وترشي ملح علي البتنجان المقشر والمتقطع دواير وتتركيه شوية لغاية اما تلاقي نقط مية ظهرت عليه . تنشفي المية عنه بفوطة نضيفة او مناديل وتقليه . انا لكل كيلو بيتنجان بغسل كباية رز ولو تحبي تكتري الرز كتري .
المهم دلوقت في قعر الحلة ترصي طماطماية متقطعة دوائر عشان لو اتلسعت شوية تتلسع الطماطم وتلزق مش البيتنجان . فوق الطماطم ترصي البيتنجان المحمر وفوق البيتنجان عايزة تحطي بطاطس او فلفل متشوحين ونحط اللحمة المسلوقة وبعدين الرز ولكل كباية رز تحطي كباية من مية سلق اللحمة المتبهرة وحطي ٢ معلقه كركم او زعفران يديه لون 

وعشان الرز كله يستوي بعد ماتحطي الشوربة بطرف معلقة خشب رفعية تعملي خروم في الرز عشان الشوربة تتوزع في الحلة . ماتحطيش زيت ولا سمنة لان زيت البيتنجان حيكفي . اتأكدي من ملوحة المية لو محتاجة ملح زيادة زودي ملح 
دلوقت تحطيها على نار عالية ولما تغلي المية وطي عليها 
تعرفي انها خلصت لما تدخلي طرف المعلقة الخشب في الحلة لتحت وتلاقي اثر زيت مش مية . بعض الناس تحط تحت غطا الحلة فوطة نضيفة وتقفل بالغطا فوقه عشان البخار مايتسربش 
ولما تخلص تجيبي صينية وتقلبيها زي الكيك 
ما ترفعيش الحلة على طول عشان تهدى وماتفرطش . وصحة وهنا